Səbail rayonunda “8 Mart – Beynəlxalq Qadınlar Günü” münasibətilə şəhid anaları ilə görüş keçirildi
Martın 5-də “8 Mart - Beynəlxalq Qadınlar günü” münasibətilə şəhid anaları ilə görüş keçirilmişdir. Görüşdə Səbail RİH başçısının müavinləri Vüqar Şixəmmədov, Eldar Ağayev və Kəmalə Həşimova, RİHBA-nın məsul əməkdaşları və şəhid anaları iştirak etmişlər.
Tədbiri giriş sözü ilə açan Səbail Rayon İcra Hakimiyyəti başçısının müavini Kəmalə Həşimova bayramlarda, əlamətdar günlərdə şəhid ailələrinin ziyarət edilməsi və onlarla görüşlərin keçirilməsinin artıq bir ənənə halını aldığını vurğulayaraq şəhid analarını “8 Mart – Beynəlxalq Qadınlar Günü” münasibətilə təbrik etmişdir. Ölkəmizin ərazi bütövlüyü uğrunda övladlarını itirən analara öz ehtiramını bildirən Kəmalə Həşimova şəhidlərimiz kimi, onların analarının, ailələrinin də hər kəs üçün çox dəyərli olduqlarını diqqətə çatdırmışdır.
Şəhid anaları Ölkə başçısı cənab İlham Əliyevin və Birinci vitse-prezident xanım Mehriban Əliyevanın hər zaman diqqət və yüksək qayğısı ilə əhatələndiklərini qeyd edərək aparılan islahatlar və yüksək işlərə görə ölkə rəhbərliyinə dərin minnətdarlıqlarını bildirmişlər.
Sonda “8 Mart – Beynəlxalq Qadınlar günü” münasibətilə görüşdə iştirak edən şəhid analarına bayram hədiyyələri təqdim edilmişdir.
