Səbail rayonunda dünya və Avropa çempionatlarında fərqlənən idmançılarla görüş keçirilmişdir

Bu gün Azərbaycanda bir çox sahələrdə olduğu kimi idmanda da böyük irəliləyişlər baş verir ki, bu da ölkə rəhbərliyinin fəaliyyəti, idmançılara, bütövlükdə ölkə idmana göstərilən dövlət qayğısından irəli gəlir.
«Attila» İdman Klubunun idmançıları 2013-cü il ərzində keçirilən dünya, Avropa və digər beynəlxalq yarışlarda uğurla çıxış edərək bir sıra əhəmiyyətli qələbələrə imza atmışlar. İlin yekunu ilə bağlı klubun yarışlarda fərqlənən idmançıları və məşqiçilərinin bir qrupu ilə Səbail rayon İcra Hakimiyyətində görüş keçirilmişdir.  

2013-cü ildə «Attila» idman klubunun idmançılarının müxtəlif yarışlarda uğurlu çıxışlarının yekunları ilə bağlı Səbail rayon İcra Hakimiyyətində təşkil olunan  görüşü açan Səbail rayon İcra Hakimiyyətinin Başçısı Asif Əsgərov  idmançıları və onların məşqçilərini salamlamış, Azərbaycan Cüdo Federasiyasının yaranması, təşəkkülü və fəaliyyəti barədə məlumat vermişdir. Qeyd olunmuşdur ki, cüdo idmanı respublikamızda çox sevilən idman növlərindəndir  və cüdo üzrə əldə olunan nailiyyətlər hər zaman xalqımızı sevindirmişdir. 1992 və 2008-ci illərdə cüdoçularımız olimpiya oyunlarından vətənə qızıl medalla qayıtmışlar. Onların uğurları ilbəil artır. Bütün bunlar isə ilk növbədə xalqımızın ümummilli lideri Heydər Əliyevin idmana olan qayğısının nəticəsi olmuşdur. Bu gün ulu öndərin siyasətinin layiqli davamçısı, Azərbaycan Respublikaasının Prezidenti, Milli Olimpiya Komitəsinin Prezidenti cənab İlham Əliyevin səyləri, idmançıları olan dövlət qayğısının artması nəticəsində idmançılarımızın beynəlxalq səviyyədə uğurları artmaqdadır. Ölkədə bir sıra olimpiya mərkəzləri, idman meydançaları tikilir, idmanın maddi-texniki bazası işkişaf etdirilir. Bu işlərin də nəticəsidir ki,   Azərbaycan idmançılarının uğurlu çıxışlarının sayı artıb.
Qeyd olunmuşdur ki, Səbail rayonunda fəaliyyət göstərən «Attila» İdman klubunun idmançıları həmişə olduğu kimi bu il ərzində də bir sıra beynəlxalq turnir və yarışlarda vətənimizi uğurla təmsil etmişlər. Belə ki, ilin ən böyük nailiyyəti avqust ayına təsadüf etmişdir. Braziliyanın Rio  de Caneyro şəhərində keçirilən böyüklər arasında dünya çempionatında klubun yetirməsi Orxan Səfərov 60 kq çəki dərəcəsində III yerə çıxaraq vətənə bütünc medalla qayıtmışdır.
Bu il Polşada keçirilən Avropa kuboku yarışlarında Rəsullu Abdulhaqq 81 kq çəki dərəcəsində I və Rasim Alməmmədov III yerə, ABŞ-ın Mayami ştatında keçirilən Dünya kuboku yarışlarında Leyla Əliyeva 40 kq çəki dərəcəsində II yerə, Gənclər arasında Avropa çempionatında Oruc Vəlizadə də 60 kq çəki dərəcəsində III yerə çıxmış, Abu Dabi şəhərində keçirilən «Böyük dəbilqə» yarışlarında 60 kq çəki dərəcəsində Orxan Səfərov və 90 kq çəki dərəcəsində Ramin Qurbanov, Rusiya Federasiyasının Tümen şəhərində keçirilən «Masters» turnirində isə Elmar Qasımov 100 kq çəki dərəcəsində üçüncü yerə çıxaraq bütünc medala layiq görülmüşlər.
Klubun məşqiçisi Vüqar Budaqov Abu Dabi şəhərində veteran idmançılar arasında keçirilən yarışlarda ikinci dəfə dünya çempionu adına layiq görülmüşdür.
Bir neçə gün əvvəl «Attila» klubu idmançıları Cüdo üzrə klublararası Azərbaycan çempionatının qalibi olmuşlar. Ümumilikdə, klubun 75 idmançısı müxtəlif beynəlxalq yarışlarda iştirak edərək müxtəlif əyarlı 24 medal qazanmış, müxtəlif yaş qrupları üzrə Azərbaycan birinciliklərində 11 idmançı I, 6 idmançı – II və 5 idmançı III yerə çıxmışlar.
A.Əsgərov bu nailiyyət münasibəti ilə idmançımızı və bu uğurda böyük əməyi olan məşqçiləri təbrik etmiş, onlara yeni-yeni uğurlar arzulamışdır.
Tədbirdə iştirak edən idmançılara və onların məşqiçilərinə Səbail rayon İcra Hakimiyyəti tərəfindən mükafatlar təqdim olunmuşdur.
İdmançılardan Orxan Səfərov, «Attila» İdman klubunun baş məşqiçisi Əli Dərvişov çıxış edərək idmançılara göstərilən diqqət və qayğıya görə ölkə rəhbərliyinə minnnətdarlıqlarını bildirmişdir.
Sonda xatirə şəkli çəkdililmişdir.