Səbail Rayon İcra Hakimiyyətində 20 Yanvar: Azərbaycan Konstitusiyası və milli suverenlik anlayışının təməli mövzusunda tədbir keçirilib
Səbail Rayon İcra Hakimiyyətində 20 Yanvar faciəsinin 35-ci ildönümünə həsr olunmuş 20 Yanvar: Azərbaycan Konstitusiyası və milli suverenlik anlayışının təməli mövzusunda tədbir keçirilmişdir. Tədbirdə Rayon İcra Hakimiyyəti başçısının müavini Kəmalə Həşimova, RİHBA-nın şöbə müdirləri və məsul əməkdaşları, rayon bələdiyyələrinin əməkdaşları iştirak etmişlər.
Tədbir ölkəmizin ərazi bütövlüyü uğrunda şəhid olmuş qəhrəmanlarımızın xatirəsinin bir dəqiqəlik sükutla yad ediməsi ilə başlanılmışdır.
Tədbirdə çıxış edənlər 1990-cı ilin yanvarında sovet imperiyasının Azərbaycanda müstəqillik və azadlıq uğrunda mübarizəyə qalxmış dinc əhaliyə qarşı törətdiyi cinayətlərdən danışmışlar. Qeyd olunmuşdur ki, Azərbaycan tarixinə 20 Yanvar - müstəqillik, suverenlik və ərazi bütövlüyünün rəmzi kimi həkk olunmuşdur. Bu hadisə qanla yazılsa da, şanlı tarix salnaməsidir. Ümummilli Lider Heydər Əliyevin quruculuq siyasəti ilə müqəddəs şəhidlərimizin adı əbədiləşdirilmiş və onların ailələri dövlət qayğısı ilə əhatə olunmuşdur. Hazırda Prezident cənab İlham Əliyev tərəfindən dövlətçiliyimiz üçün mühüm əhəmiyyət kəsb edən bu ənənə davam etdirilir. Hər il 20 Yanvar faciəsi qurbanlarının xatirəsi dərin ehtiramla yad olunur və bu hadisə ilə bağlı xüsusi tədbirlər görülür.
Sonda RİHBA-nın İctimai-siyasi və humanitar məsələlər şöbəsinin əməkdaşlarının “1990-cı il 20 yanvar hadisələrinin hüquqi-siyasi qiyməti” və “20 yanvar faciəsinin beynəlxalq hüquqda qiymətləndirilməsu” mövzularında məruzələri dinlənilmiş və 20 Yanvar faciəsi ilə əlaqədar hazırlanmış qısametrajlı film nümayiş olunmuşdur.
