Səbaillilər Bakıda rəsmi səfərdə olan Rusiya Federasiyasının Xəzər Dəniz Donanmasının gəmilərində olmuşlar
Ötən gün Bakıya rəsmi səfərə gələn Rusiya Federasiyası Xəzər Hərbi Dəniz Donanmasının «Dağıstan» böyük raket gözətçisi və «Qrad Sviyajsk» kiçik raket gözətçi gəmilərinin daxil olduğu hərbi qrupun rəhbər heyəti səfər proqramı çərçivəsində Səbail rayon İcra Hakimiyyətində rayon rəhbərliyi tərəfindən qəbul olunmuşlar. Proqrama uyğun olaraq Səbail rayon rəhbərliyi və rayon ictimaiyyətinin bir qrupu Bakı buxtasında reyddə duran gəmilərlə tanışlıq üçün Dövlət Bayrağı Meydanına gəlmişlər.
Nümayəndə heyətini qarşılayan Bakıya səfərə gələn Rusiya Federasiyası Xəzər Dəniz Donanmasının nümayəndə heyətinin rəhbəri I dərəcəli kapitan Valeri Smirnov səbailliləri salamlamış, hərbi gəmilərin Bakıdaya gəlişinin məqsədi və Rusiya Federasiyası ilə Azərbaycan Respublikası Silahlı Qüvvələri arasında əlaqələrin möhkəmlənməsinin əhəmiyyətindən danışmış və RİH-də təşkil olunan görüşə görə öz minnətdarlığını bildirmişdir.
Səbailli qonaqlar ilk növbədə «Dağıstan» böyük raket gözətçisi gəmisinə gəlmişlər. Burada gəminin kapitanı, II dərəcəli kapitan Vüsal Miriyev qonaqları gəmi ilə tanış edərək onun döyüş qabiliyyəti, silahları, şəxsi heyətin məişəti barədə danışmışdır. Vüsal Miriyev «Dağıstan» gəmisinin Bakıya keçən gəlişi zamanı Azərbaycan Respublikasının Prezidenti cənab İlham Əliyev və Rusiya Federasiyasının Prezidenti cənab Vladimir Putinin gəmi ilə birgə tanışlığı barədə məlumat vermişdir.
Daha sonra qonaqlar «Qrad Sviyajsk» kiçik raket gözətçi gəmisində olmuş, gəminin kapitanı III dərəcəli kapitan Aleksey Qordeyev gəmi barədə ətraflı məlumat vermişdir. Rusiyalı hərbiçilər qonaqların, xüsusilə də nümayəndə heyətinin tərkibində gəmiyə gəlmiş Azərbaycan Dövlət Dəniz Akademiyasının kursantlarının çoxsaylı suallarını cavablandırmışlar.
Səbail rayon İcra Hakimiyyəti Başçısının müavini Eldar Ağayev hərbi dənizçiləri RİH adından salamlamış, Bakının mərkəzi rayonu olan Səbail rayonun stateji əhəmiyyət kəsb etdiyini bildirmiş və rayonun tarixi, coğrafi mövqeyi, burada yerləşən inzibati, sənaye, sosial, mədəniyyət, turizm obyektləri, həmçinin rayonda keçirilən beynəlxalq tədbirlər barədə məlumat vermişdir. Eldar Ağayev səmimi görüşə və gəmilərlə tanışlığa görə hərbiçilərə öz minnətdarlığını bildirmişdir.
Gəmilərlə yaxından tanış olan qonaqlar gəmi komandası ilə birgə şəkillər çəkdilmişlər.
Görüşdən sonra hərbi dənizçilər İçəri şəhərə gəlmiş, Qız qalası, Şirvanşahlar Saray Kompleksi və digər tarixi abidələrlə tanış olmuşlar.
