Səbail rayonunda «Yaşıl marafon» uğurla davam edir

Bu ilin noyabr ayından ölkəmizin bütün guşələrində Heydər Əliyev Fondunun vitse-prezidenti, Ətraf Mühitin Mühafizəsi üzrə Beynəlxalq Dialoq Təşəbbüsnün təsisçisi və rəhbəri Leyla Əliyevanın təşəbbüsü ilə start götürmüş «Ümumrespublika yaşıllaşdırma marafonu» çərçivəsində keçirilən aksiyalar zamanı on minlərlə ağac əkilmişdir. Bu nəcib təşəbbüsə ilk qoşulanlardan biri də Bakı şəhərinin mərkəzi rayonu olan Səbail rayonu olmuşdur.

Ölkəmizin və eləcə də onun paytaxtının daha da abadlaşdırılması və çiçəklənməsinə yardımçı olan bu layihə çərçivəsində görülən işlər Azərbaycan Respublikasının Prezidenti cənab İlham Əliyevin respublikamızın paytaxtında yaşıllıqların artırılması barədə göstərişinin yuksək səviyyədə həyata keçirilməsinə xidmət göstərir.
Məqsədi ağac əkilməsini təşviq edərək ətraf mühitin mühafizəsinə töhfə verməkdən ibarət olan novbəti iməclik rayonun Abbasqulu Abbaszadə küçəsi boyunca keçirilmişdir. Həmin gün iməclikdə rayon İcra Hakimiyyətinin, rayonun idarə və təşkilatlarının, təsərrüfat xidmətlərinin əməkdaşları ilə yanaşı, ali və orta məktəblərin  kollektivləri, ümumilikdə 500 nəfər qoşulmuşdur.
Havanın əlverişsiz olmasına baxmayaraq səhər tezdən start götürən ağacəkmə kompaniyasında çox böyük fəallıq nəzərə çarpırdı. Abadlaşdırılan ərazidə əvvəlcədən təmizləmə işləri görülmüş, yeni torpaq qatı salınmış, bura mineral gübrələr səpilmişdir. Burada yeni əkiləcək ağacların suvarılması üçün su maşınları cəlb olunmuş, böyük miqdarda dekorativ ağac və gül kolları alınmışdır. Biomüxtəlifliyin artırılması və rayonun florasının daha da zənginləşdiyilməsi məqsədi ilə yerli ağac növləri ilə yanaşı bir sıra xarici ölkələrdən müxtəlif gül və ağac kolları gətirilmişdir.
Gün ərzində keçirilən ağacəkmə aksiyası zamanı 1000 ədəd yeni ağac və 1000 ədəd gül kolu əkilmiş, əvvəl əkilmiş 3000 ədəd ağaca qulluq göstərilmişdir.
Yol kənarlarında əkilən ağaclar bu ərazidə ekoloci tarazlığın bərpası və ətraf mühitin təhlükəsizliyinin, insanların sağlamlığının təmin edilməsi, Səbail rayonunda yaşıllıqların artırılması, ərazinin gözəlləşməsi, yeni ağacların əkilməsi istiqamətində görülən işlərin davamı olmuşdur.
Səbail rayon İcra Hakimiyyətinin Başçısı Asif Əsgərov aksiyada iştirak edərək bu ərazidə aparılan yaşıllaşdırma-abadlıq işləri ilə bağlı tapşırıq və tövsiyələrini vermişdir. Asif Əsgərov ağacəkmə aksiyasında fəallıq göstərən gənclərə İDEA İctimai Birliyinin «Yaşıl marafon» layihəsi, onun məqsəd və məramı barədə məlumat vermiş, qeyd etmişdir ki, ölkənin ekoloci mühitinin, son nəticədə isə insanların sağlamlaşdırılmasına xidmət edən bu nəcib təşəbbüsün dəstəkləməsi və onun reallaşmasında iştirak etmək hər birimizin borcudur.
Qeyd etmək lazımdır ki, bu aksiya çərçivəsində Səbail rayonunda noyabr ayının əvvəlində keçirilən iməcliklərdə 3000 ədəd yeni ağac və 1000 ədəd gül kolu əkilmiş, yeni hazırlanmış sahəyə 3500 kvadrat metr qazon otu döşənmiş, əvvəl əkilmiş 2000 ədəd ağaclara qulluq göstərilmişdir.