Bibiheybət qəsəbəsində Novruz bayramı qeyd olunmuşdur

Qədim ənənələrə məxsus Bibiheybət qəsəbəsində qəsəbə nümayəndəliyinin və bələdiyyənin təşkilatçılığı ilə qəsəbənin 50 saylı orta məktəbinin həyətində qəsəbə sakinləri, bələdiyyə üzvləri, ağsaqqalların, məktəbin şagirdlərinin və qəsəbə yaxınlığındakı hərbi hissənin şəxsi heyətinin nümayəndələrinin  iştirakı ilə bayram tədbiri keçirilmişdir. 
Gözəl  bəzədilmiş  həyətdə bayram süfrələri açılmış, xonçalar qoyulmuşdu. Bayram tədbirində çıxış edən Bibiheybət qəsəbə nümayəndəsi Fariz Xəlilov qəsəbə sakinlərinin bayramını təbrik etmiş, onlara xöşbəxtlik, səadət və ailələrinə ruzi-bərəkət arzulamışdır.   
50 saylı orta məktəbin direktoru Sədaqət Həsənova tədbir iştirakçılarını salamlamış, xalqımızın qədim adət və ənənələri barədə məlumat verilmiş, onların Abşeronun ən qədim kəndlərindən olan Bibiheybətdə qorunaraq bu günkü nəsillərə çatdırılmasının əhəmiyyətini vurğulamışdır.
Məktəb şagirdləri, tədbirə dəvət olunmuş incəsənət ustaları, Bibiheybət qəsəbə mədəniyyət evinin xalq çalğı alətləri ansamblı və ansamblın solistləri öz ifaları ilə tədbiri daha şən etmişdir. Məktəblilər hazırladıqları şer və mahnılarla qəsəbə sakinləri qarşısında çıxış etmişlər. Kosa və keçəlin, tanınmış müğənnilərin çıxışları tədbiri daha da şənləndirmişdir.
Həyətdə bayram tonqalı yandırılmış, uşaqlar tonqal ətrafında yallı getmiş,   rəqs etmişlər.