Mobil qruplar karantin rejimi tələblərinin yerinə yetirilməsinə nəzarət işini intensiv şəkildə davam etdirirlər

Səbail rayonu ərazisində koronavirusun (COVID-19) yayılmasının qarşısının alınması məqsədilə Nazirlər Kabineti yanında Operativ Qərargahın tələb və tövsiyələrinə uyğun olaraq qabaqlayıcı tədbirlər davam etdirilir.
Rayon ərazisində xüsusi karantin rejiminin tələblərinin icrasına nəzarət məqsədilə Səbail rayonunda fəaliyyət göstərən Operativ Qərargah tərəfindən 20 yeni mobil qrup yaradılmışdır. Səbail Rayon İcra Hakimiyyəti Aparatının, Səbail Rayon Polis İdarəsinin, İnzibati Ərazi Dairələri nümayəndəliklərinin, Rayon Mənzil-Kommunal Təsərrüfatı Birliyinin və bələdiyyələrin əməkdaşlarından ibarət qruplar vasitəsilə rayon ərazisində əhali arasında maarifləndirmə işləri aparılır.
Mobil qruplar rayonun mərkəzi hissəsində, Badamdar və Bibiheybət qəsəbələrində eləcə də,  Bayıl və 20-ci yaşayış sahələrində əhalinin sıx toplaşdığı ərazilərdə insanlar arasında koronavirus infeksiyasının yarada biləcəyi təhlükənin qarşısının alınması, karantin rejimi tələblərinin yerinə yetirilməsinə nəzarət, habelə fərdi izahetmə-xəbərdarlıq işini davam etdirirlər.
Səbail rayonunda xüsusi karantin rejiminin tələblərinə əməl olunmasına nəzarəti təmin etmək məqsədi ilə mobil qruplar vasitəsilə gündəlik olaraq əhalinin xüsusi karantin rejiminə əməl etməsinə nəzarət qətiyyətlə davam etdiriləcək. Nizam-intizami pozan şəxslər barəsində isə qanuni tədbirlərin görülməsi təmin olunacaqdır.
Səbail Rayon İcra Hakimiyyəti başçısı yanında yaradılmış Operativ Qərargahın əsas məqsədi insan həyatı üçün təhlükə olan koronavirusla mübarizədə bütün xalqımızı həmrəy olmağa, bəşəriyyətin bəlasına çevrilən virusu yaymamaq üçün evdə qalmağa dəvət etməkdir. Vətəndaşlara şəxsi gigiyena qaydalarına əməl etməyə, digər şəxslərlə minimum kontaktda olmağa, ünsiyyət zamanı iki metrlik ara məsafəsi saxlamağa və Nazirlər Kabineti yanında Operativ Qərargahın bütün tələb və tövsiyələrinə ciddi şəkildə riayət etmələrini tövsiyə edirik.