Səbaildə koronavirusa yoluxmuş və ev şəraitində müalicə olunan şəxslərlə gücləndirilmiş qaydada maarifləndirmə işləri davam edir

Koronavirus (COVID-19) pandemiyası ilə mübarizədə əhalinin sağlamlığının qorunması və onun törədə biləcəyi fəsadların qarşısının alınması məqsədilə Səbail rayonunda koronavirusa yoluxmuş və ev şəraitində müalicə olunan şəxslərlə gücləndirilmiş qaydada maarifləndirmə işləri davam edir.
Səbail Rayon İcra Hakimiyyəti başçısının yanında fəaliyyət göstərən operativ qərargah tərəfindən yaradılmış mobil qrupların üzvləri tərəfindən qeyd olunan şəxslərin (onların ailə üzvlərinin) yaşadıqları fərdi yaşayış evlərinin və çoxmənzilli yaşayış evlərinin giriş qapılarında elanlar yerləşdirilir, qonşulara xəbərdarlıq edilir və həmin ünvanlarda zəruri avadanlıq və preparatlarla təchiz olunan işçi qrupları tərəfindən dezinfeksiya işləri həyata keçirilir.
Həmçinin koronavirus xəstəliyinə yoluxmuş vətəndaşlara ev şəraitində müalicə alarkən ailə üzvləri ilə davranış üçün tövsiyə olunan qaydalar haqqında məlumatlar verilir. Müalicə alan xəstələrə ilk növbədə xəstə üçün ayrılmış bir otaqda izolyasiya olunmaqları üçün tədbirlər görülür. Eyni zamanda, COVİD-19-a yoluxmuş,  tək yaşayan xəstələrə ərzaq və ya lazımi dərmanları market və aptekdən əldə edə bilmələri üçün mobil qrup üzvləri tərəfindən müvafiq köməklik göstərilir.