Səbail rayonunda akademik Zərifə xanım Əliyevanın 100-cü ildönümü ilə əlaqədar xatirəsi anıldı

Aprelin 28-də görkəmli oftalmoloq-alim, akademik Zərifə xanım Əliyevanın anadan olmasının 100-cü ildönümü ilə əlaqədar Səbail Rayon İcra Hakimiyyəti başçısının müavini Kəmalə Həşimova, Səbail RİHBA-nın məsul əməkdaşları və rayonun səhiyyə müəssisələrinin rəhbərləri Fəxri Xiyabanda xalqımızın Ümummilli lideri Heydər Əliyevin və Zərifə xanım Əliyevanın məzarlarını ziyarət etmiş, onların əziz xatirələrini dərin ehtiramla yad edərək məzarları önünə gül dəstələri düzmüşlər.

Daha sonra Səbail Rayon İcra Hakimiyyətində Səbail RİHBA-nın məsul şəxslərinin iştirakı ilə anım tədbiri təşkil olunmuşdur.

Tədbiri giriş sözü ilə açan Rayon İcra Hakimiyyəti başçısının müavini Kəmalə Həşimova görkəmli oftalmoloq-alim, akademik Zərifə xanım Əliyevanın tibb elminə verdiyi böyük töhfələrdən, oftalmologiyaya gətirdiyi yeniliklərdən danışmış, onun dövrünün ən sayılan və seçilən həkimlərindən olduğunu qeyd etmiş, həmçinin, Zərifə xanımın vəfalı ömür-gün yoldaşı olduğunu, ailə dəyərlərinin ən gözəl nümunəsini göstərdiyini və Azərbaycan xanımının bütün gözəl keyfiyyətlərini özündə birləşdirən ziyalı kimi onu tanıyan bütün insanların yaddaşında xoş xatirələrlə qaldığı bildirmişdir.

Tədbir zamanı akademik Zərifə xanım Əliyevanın həyat və fəaliyyətini əks etdirən videoçarx nümayiş olunmuşdur.