Səbaildə 27 sentyabr - Anım Gününə həsr olunmuş ağacəkmə aksiyası keçirilmişdir
Bu gün 27 sentyabr - Anım Gününə ehtiram əlaməti olaraq Səbail rayonu, Salyan şosesində Səbail Rayon İcra Hakimiyyətinin təşkilatçılığı ilə ağacəkmə aksiyası təşkil olunmuşdur. Tədbirdə Səbail Rayon İcra Hakimiyyətinin başçısı Vuqar Zeynalov, RİH başçısının müavinləri, RİHBA-nın məsul əməkdaşları, hüquq-mühafizə orqanlarının nümayəndələri, şəhidlərin ailə üzvləri, döyüş yoldaşları və rayon ictimaiyyətinin nümayəndələri iştirak etmişlər.
Aksiya çərçivəsində Səbail rayonunun təbii-coğrafi iqlim şəraitinə uyğun olaraq Salyan şosesi boyu 300-dən artıq müxtəlif növ ağaclar əkilmiş, əkilən ağacların fasiləsiz olaraq suvarılması, hər zaman yaşıl qalması və torpağın münbit olması üçün damcı üsulu ilə suvarma sistemi quraşdırılmış və onların mühafizəsi üçün qoruyucu zolaqlar çəkilmişdir.
27 sentyabr - Anım Günü münasibətilə Səbail Rayon İcra Hakimiyyəti tərəfindən təsdiq olunmuş Tədbirlər Planına əsasən rayon ərazisində keçirilən silsilə tədbirlər davam edir.
