Səbaildə 21- fevral Beynəlxalq Ana Dili Günü ilə bağlı tədbir keçirilmişdir
Səbail rayonunda Beynəlxalq Ana Dili Gününə həsr olunmuş “Danışan heykəllər” adlı tədbir keçirilmişdir. Tədbirdə Səbail Rayon İcra Hakimiyyəti başçısının müavini Kəmalə Həşimova, RİHBA-nın İctimai-siyasi və humanitar məsələlər şöbəsinin müdiri Leyli Mirzəyeva, akademik Nizami Cəfərov, AMEA-nın Dilçilik İnstitutunun Filologiya üzrə fəlsəfə doktoru Elnarə Əliyeva, Pantomima Teatrının rejissoru, əməkdar artist Bəhruz Vaqifoğlu, gənc senarist Pərviz Seyidli, 132-134 nömrəli Təhsil Kompleksinin müəllim və şagird kollektivi iştirak etmişlər.
Ölkəmizdə ana dilinin hərtərəfli inkişafı, işlək dilə çevrilməsi, beynəlxalq münasibətlər sisteminə yol tapması dilimizin gözəl bilicisi, mahir natiq ulu öndər Heydər Əliyevin dilin qorunmasına yönələn düşünülmüş siyasətinin nəticəsidir. Hazırda bu ənənələri Prezident İlham Əliyev uğurla davam etdirməkdədir.
Tədbirdə Azərbaycan, rus və ingilis bölmələri üzrə şagirdlər ədəbi-bədii kompozisiyalarla çıxış etmişlər. Dahi şairlərimizin, yazıçı və ədiblərimizin əsərlərinə müraciət edilmiş, böyük siyasi xadimlərimizin ana dilimiz haqqında dəyərli sözləri səsləndirilmiş, rəqslər ifa olunmuşdur. Tamaşanın ssenari müəllifi kompleksin Azərbaycan dili müəllimi Rəna Əliyevadır.
Tədbirin məqsədi ən qiymətli mirasımız olan dilimizin saflığının qorunması, onun zənginliyini, zərifliyini şagirdlərə aşılamaq və dilimizi sevərək, sevdirərək, qoruyaraq, gələcək nəsillərə ötürməkdir.
