Səbail rayonunda “Heydər Əliyevin 100 illiyi (1923-2023)” yubiley medalı ilə təltif edilənlərə medalları təqdim olunub

Azərbaycan Respublikasının Prezidenti cənab İlham Əliyevin müvafiq Sərəncamı ilə bir sıra şəxslər 2023-cü ildə “Heydər Əliyev İli” ilə bağlı təsdiqlənmiş “Tədbirlər Planı”na uyğun olaraq təsis olunan “Heydər Əliyevin 100 illiyi (1923-2023)” yubiley medalı ilə təltif olunmuşlar. Sərəncama əsasən Səbail rayonundan Rayon İcra Hakimiyyətinin başçısı Zeynalov Vuqar Teyyub oğlu, 132-134 nömrəli təhsil kompleksinin direktoru Xanlarova  Sara Cəbrayıl qızı və Azərbaycan Respublikası Müharibə, Əmək və Silahlı Qüvvələr Veteranları Təşkilatının Rəyasət Heyətinin üzvü, polkovnik-leytenant Ağakişiyev Bəhram Lətif oğlu "Heydər Əliyevin 100 illiyi (1923-2023)" yubiley medalı ilə təltif edilmişlər.

Yubiley medallarının təqdim olunması ilə əlaqədar Səbail Rayon İcra Hakimiyyətində keçirilən tədbir zamanı təltif olunan şəxsləri təbrik edən Rayon İcra Hakimiyyətinin başçısı Vuqar Zeynalov müasir və müstəqil Azərbaycan dövlətinin memarı və qurucusu Ulu Öndər Heydər Əliyevin xalqımız və dövlətçiliyimiz qarşısındakı misilsiz xidmətlərindən danışaraq Azərbaycanın davamlı tərəqqisi və parlaq gələcəyi naminə xidmət edən hər kəsin ən başlıca vəzifəsinin dövlətə və dövlətçiliyə sədaqət nümayiş etdirməklə qarşıya qoyulan bütün vəzifələrin öhdəsindən layiqincə gəlmək üçün əlindən gələni əsirgəməmək olduğunu qeyd etmişdir.

Tədbir zamanı təltif olunanlar çıxış edərək Ulu Öndər Heydər Əliyevin siyasi davamçısı, Müzəffər Ali Baş Komandan, Prezident İlham Əliyevə onlara göstərilən diqqətə və ali mükafata görə təşəkkürlərini ifadə etmişlər.