Səbail rayonunda “Konstitusiya və Suverenlik İli” çərçivəsində Tədbirlər planının icra vəziyyəti və işin təşkili ilə bağlı səmərəliliyin artırılmasına həsr olunmuş müşavirə keçirilib
Səbail Rayon İcra Hakimiyyətinin başçısı Vuqar Zeynalovun sədrliyi ilə Rayon İcra Hakimiyyətində “Konstitusiya və Suverenlik İli” çərçivəsində Tədbirlər planının icra vəziyyəti və işin təşkili ilə bağlı səmərəliliyin artırılmasına həsr olunmuş müşavirə keçirilmişdir. Müşavirədə Rayon İcra Hakimiyyəti başçısının müavinləri, RİHBA-nın şöbə müdirləri və məsul əməkdaşları iştirak etmişlər.
Müşavirə zamanı Rayon İcra Hakimiyyətinin başçısı Vuqar Zeynalov çıxış edərək istənilən xalq üçün müstəqil, suveren dövlətini yaratmaq və onu inkişaf etdirməyin ən böyük nailiyyət olduğunu və Azərbaycan xalqı üçün bu nailiyyətin hüquqi-siyasi, sosial-iqtisadi fundamentinin məhz Ümummilli Lider Heydər Əliyev tərəfindən formalaşdırıldığını diqqətə çatdırmışdır. Azərbaycan Respublikasında “Konstitusiya və Suverenlik İli” elan edilməsi ilə bağlı Azərbaycan Respublikasının Prezidenti cənab İlham Əliyevin imzaladığı Sərəncamın dövlətçilik tariximizin daha da dərindən öyrənilməsi baxımından xüsusi əhəmiyyət daşıdığını vurğulayan RİH başçısı Vuqar Zeynalov imzalanan bu Sərəncamın ölkəmizin keçmişi, bu günü və gələcəyi üçün xüsusi məna ifadə etdiyini, hüquqi dövlətçilik və suverenlik dəyərlərinin yeni qlobal çağırışlar əsasında formalaşdırılması üçün bir fürsət kimi dəyərləndirilməli olduğunu qeyd etmişdir.
Tədbir zamanı Azərbaycan Respublikasının Prezidenti cənab İlham Əliyevin və Birinci vitse-prezident Mehriban xanım Əliyevanın tapşırıq və göstərişlərinə uyğun olaraq rayon ərazisində infrastruktur layihələrinin icra olunması, nəzərdə tutulan yeni abadlıq-quruculuq layihələri, mərkəz ərazilərin sanitar vəziyyətinin yüksək səviyyədə saxlanılması, qanunsuz tikinti işlərinin qarşısının alınması, vətəndaşların mənafeyinin qorunması istiqamətində aparılan ardıcıl işlərdən danışan Rayon İcra Hakimiyyətinin başçısı Vuqar Zeynalov verilən tapşırıqların vaxtında, düzgün və məsuliyyətlə icra olunması, vətəndaşlar tərəfindən daxil olan müraciətlərə operativ və qısa müddət ərzində baxılması üçün tədbirlərin həyata keçirilməsi, dövlət qulluqçularının məsuliyyətinin artırılması, eyni zamanda idarələrarası sənəd dövriyəsi zamanı uyğunsuzluq və çatışmazlıqlara yol verilməməsi istiqamətində ciddi tapşırıqlar vermişdir.
