Şəhid Məmməd Mirzəməmmədovun xatirə lövhəsinin açılış mərasimi keçirildi
Qarabağ Müharibəsi zamanı Vətənin ərazi bütövlüyü uğrunda canından keçərək şəhid olmuş Mirzəməmmədov Məmməd Məhbul oğlunun əziz xatirəsinin əbədiləşdirilməsi məqsədilə Badamdar qəsəbəsi, T.Məmmədov küçəsi 4 ünvanında Səbail Rayon İcra Hakimiyyəti tərəfindən hazırlanan xatirə lövhəsinin açılış mərasimi keçirilmişdir. Tədbirdə Səbail RİH başçısı Vuqar Zeynalov, RİHB-nın müavinləri, RİHBA-nın məsul əməkdaşları, şəhidlərin ailə üzvləri, döyüş yoldaşları və rayon ictimaiyyətinin nümayəndələri iştirak etmişlər.
Tədbir zamanı çıxış edən Səbail RİH başçısı Vuqar Zeynalov Azərbaycan dövləti tərəfindən şəhid ailələrinə, müharibə veteranlarına və qazilərə yüksək diqqət və qayğı göstərildiyini bildirərək Ölkə başçısı cənab İlham Əliyev və Birinci vitse-prezident Mehriban xanım Əliyeva tərəfindən bütün dövlət qurumları qarşısında bu həssas təbəqəyə aid olan insanların problemlərinin həllini ən əsas vəzifələrdən biri kimi müəyyən edildiyini tədbir iştirakçılarının diqqətinə çatdırmışdır.
Mərasim zamanı Məmməd Mirzəməmmədov döyüş yoldaşları və yaxınları şəhid haqqında öz xatirələrini bölüşərək qeyd etmişlər ki, hələ uşaq yaşlarından vətənpərvər ruhda yetişdirilən Məmməd Mirzəməmmədov ermənilərin Azərbaycan xalqına törətdikləri amansızlıqlara dözə bilməyərək 1992-ci ildə könüllü olaraq ordu sıralarına yazılaraq döyüşlərə qatılmışdır. Məmməd Mirzəməmmədov müharibəyə gedəndə ailəli idi və üç övladı var idi. Qızğın döyüşlərin getdiyi Ağdam rayonuna göndərilən Məmməd Mirzəməmmədov qorxmaz və bacarıqlı əsgər kimi tanınmış, Vətən uğrunda gedən amansız döyüşlərdə xüsusi fədakarlıq göstərmişdir. 1994-cü ilin aprelin 24-də Ağdam rayonu istiqamətində gedən döyüşlər zamanı şəhidlik zirvəsinə ucalmışdır.
Məmməd Mirzəməmmədov ailə üzvləri şəhidin xatirəsinin əziz tutulmasından məmnunluğunu ifadə etmiş, aparılan yüksək işlərə görə Ölkə başçısı cənab İlham Əliyevə və Birinci vitse-prezident Mehriban xanım Əliyevaya minnətdarlıqlarını bildirmişlər.
