Səbail məktəbliləri Xocalı Soyqırımının 33-cü ildönümü ilə əlaqədar Memorial Soyqırım muzeyini ziyarət edib

Səbail rayon Icra Hakimiyyətinin təşkilatçılığı və Azərbaycan Respublikası Hərbi Prokurorluğunun dəstəyi ilə, 160 nömrəli Klassik Gimnaziyanın müəllim və şagird heyəti üçün Azərbaycan Respublikası Hərbi Prokurorluğunun inzibati binasında yaradılmış Memorial Soyqırım muzeyinə ziyarət təşkil olunmuşdur.
Memorial Soyqırımı Muzeyini ziyarət edən konfrans iştirakçılarına muzey və orada saxlanılan, tarixi həqiqətləri, o cümlədən Xocalı soyqırımı haqqında reallığı əks etdirən eksponatlar barədə ətraflı məlumat verilib. Şagirdlər muzeyin girişində asılmış rəsm əsərləri ilə tanış olublar. Həmçinin muzeylə tanışlıq zamanı tarix və deportasiya-repressiya bölmələrində XX əsrin əvvəllərində Azərbaycanın müxtəlif ərazilərinin dağıdılıb viranə qoyulmuş görüntüləri, əhalinin həyat tərzi əks etdirən fotolar haqqında ətraflı məlumat verilib. Məktəblilər muzeydə quraşdırılmış sensor ekranlı monitordakı xüsusi xəritədə ermənilərin ötən əsrdə xalqımıza qarşı ölkəmizin müxtəlif bölgələrində həyata keçirdikləri soyqırımları barədə bir neçə dildə məlumatlar əldə etmişlər. Ümummilli Lider Heydər Əliyevin və Prezident cənab İlham Əliyevin azərbaycanlılara qarşı həyata keçirilən soyqırımı siyasətinin ifşa olunaraq dünya ictimaiyyətinə çatdırılması istiqamətində gördükləri işlərin və imzaladıqları sərəncamların nümayiş etdirildiyi guşə ilə tanış olmuşlar.