Səbaildə “Məişət zorakılığından zərər çəkmiş şəxslərin təhlükəsizliyinin təmin olunması istiqamətində tədbirlərin gücləndirilməsi” mövzusunda dəyirmi masa keçirilib

Səbail Rayon İcra Hakimiyyətində “Konstitusiya və Suverenlik İli” çərçivəsində “Məişət zorakılığından zərər çəkmiş şəxslərin təhlükəsizliyinin təmin olunması istiqamətində tədbirlərin gücləndirilməsi” mövzusunda dəyirmi masa təşkil olunub. Tədbirdə Səbail Rayon İcra Hakimiyyəti başçısının müavini Kəmalə Həşimova, Azərbaycan Respublikasının Baş Prokurorluğunun Cinayət təqibindən kənar icraatlar idarəsinin böyük prokuroru Namiq Əliyev, Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin şöbə müdiri Sevinc Əmirova, AQUP üzrə DK-nın Hüquqi təminat şöbəsinin məişət zorakılığına məruz qalması üzrə sektorun baş məsləhətçisi Rahil Süleymanzadə, Səbail Rayon Məhkəməsinin hakimi Rəna Qafarova, Səbail Rayon İcra Şöbəsi, icra məmuru İlham Əliyev, Səbail Rayon Prokurorunun köməkçisi Sevinc Şıxəliyeva,  39-cu Polis Bölməsinin Sahə Rəisi, polis polkovnik-leytenantı Qabil Kərimov, RİHBA-nın şöbə müdirləri və məsul əməkdaşları iştirak etmişlər.
Tədbir zamanı bildirilmişdir ki, məişət zorakılığı hallarının qarşısının alınması üçün maarifləndirmə işinin gücləndirilməsi dövlətimizin daxili siyasətində bu gün ən mühüm prioritetlərdən biridir. Məişət zorakılığının qarşısının alınması – məişət zorakılığı təhlükəsinin aradan qaldırılması məqsədi ilə həyata keçirilən hüquqi, sosial və qabaqlayıcı tədbirlərdir.
Səbail RİHBA-nın Hüquq şöbəsinin müdiri Nərmin Abuzərli təqdimat ilə çıxış edərək maarifləndirmə işinin gücləndirilməsini xüsusi vurğulamış, belə halların vaxtında müəyyən edilməsinin vacibliyindən ətraflı bəhs etmişdir.
Dəyirmi masa məişət zorakılığı ilə mübarizəyə dair Milli Fəaliyyət Planı icrasını təmin etmək məqsədilə 12.7.4. nömrəli yarımbəndinə əsasən Məişət zorakılığından zərər çəkmiş şəxslərin təhlükəsizliyinin təmin olunması istiqamətində tədbirlərin gücləndirilməsi və məişət zorakılığının qarşısının alınmasına dair qanunvericiliyə edilən dəyişikliklər ətraflı müzakirə olunmuşdur.
Tədbirin yekununda mövzu ilə əlaqədar iştirakçılara məlumatlandırıcı bülletenlər təqdim olunmuş, videoçarx nümayiş olunmuşdur.