Səbaildə velosiped marafonu keçirilib
Martın 8-də “İdman həftəsi” çərçivəsində Azərbaycan Velosiped Federasiyası, Gənclər və İdman Nazirliyi və Azərbaycan Yerüstü Nəqliyyat Agentliyinin (AYNA) birgə təşkilatçılığı ilə Bakıda qadınlar arasında velosiped marafonu keçirilib.
Tədbirdə Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla xanım Əliyeva, Azərbaycan Respublikasının gənclər və idman naziri Fərid Qayıbov, Azərbaycan Velosiped Federasiyasının prezidenti Mədət Quliyev, Səbail Rayon İcra Hakimiyyəti başçısının müavini Kəmalə Həşimova, RİHBA-nın İctimai-Siyasi və humanitar məsələlər şöbəsinin məsul əməkdaşları iştirak ediblər.
Müxtəlif sahələrdən olan qadınları bir araya gətirən attraksion Dənizkənarı Bulvarda baş tutub. Yürüşün əsas məqsədi həvəskar qadın velosipedçilərin asudə vaxtlarından səmərəli istifadə etmələrinə dəstək olmaq, velosipedləri ekoloji cəhətdən təmiz nəqliyyat növü kimi təbliğ etmək və qadınları velosiped sürməyə həvəsləndirmək olub.
