Vətən müharibəsi şəhidi Nicat Şükürlünün adı yaşadığı küçəyə verildi
44 günlük Vətən müharibəsindəki qələbəmizdə şəhidlik zirvəsinə ucalmış Şükürlü Nicat Ayaz oğlunun Səbail rayonu, Bayıl yaşayış massivində şəhidin yaşadığı küçəyə adının verilməsi və qeyd olunan küçədə şəhidin xatirə lövhəsinin açılışı ilə əlaqədar tədbir keçirilmişdir. Tədbirdə Səbail Rayon İcra Hakimiyyətinin başçısı Vuqar Zeynalov, RİH başçısının müavinləri, YAP Səbail rayon təşkilatının sədri Muxtar Nağıyev, RİHBA-nın məsul əməkdaşları, şəhid ailələri, müharibə veteranları və rayon ictimaiyyət nümayəndələri iştirak etmişlər.
Mərasim zamanı çıxış edən Rayon İcra Hakimiyyətinin başçısı Vuqar Zeynalov Azərbaycan Respublikasının Prezidenti cənab İlham Əliyev və Birinci vitse-prezident xanım Mehriban Əliyeva tapşırıq və tövsiyələrinə uyğun olaraq ölkəmizdə şəhidlərə dövlət səviyyəsində verilən yüksək qiymətdən və onlara göstərilən diqqət və qayğıdan danışmış, şəhidlərinin xatirəsinin əbədiləşdirilməsi, şəhid ailələrinin problemlərinin həlli, eyni zamanda müharibə əlillərinin sağlamlığının bərpası istiqamətində mühüm işlər görüldüyünü vurğulayaraq hər bir şəhid ailəsinin bundan sonra da dövlət qayğısı ilə əhatə olunacağını bildirmişdir.
Şəhidin ailə üzvləri hər zaman onlara göstərilən diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident xanım Mehriban Əliyevaya minnətdarlıqlarını bildirmişlər.
Qeyd edək ki, Vətən müharibəsinin ilk günlərindən döyüşə atılan Nicat Şükürlü 2020-ci il oktyabrın 12-də Xocavənd rayonu istiqamətində gedən döyüşlərdə şəhid olmuşdur. Döyüşlərdə göstərdiyi qəhrəmanlığa görə Azərbaycan Respublikasının Prezidenti cənab İlham Əliyev tərəfindən ölümündən sonra 3-cü dərəcəli “Vətənə xidmətə görə” ordeni, “Füzulinin azad olunmasına görə”, “Xocavəndin azad olunmasına görə” və "Vətən uğrunda” medalları ilə təltif edilmişdir.
