Səbail rayonunda Ulu Öndər Heydər Əliyevin anadan olmasının 101 illiyinə həsr olunmuş “Sən elə bir zirvəsən” adlı konfrans keçirilib

Mayın 6-da Səbail Rayon İcra Hakimiyyətində Ulu Öndər Heydər Əliyevin anadan olmasının 101 illiyinə həsr olunmuş “Sən elə bir zirvəsən” adlı konfrans keçirilmişdir. Tədbirdə Rayon İcra Hakimiyyətinin başçısı Vuqar Zeynalov, RİH başçısının müavinləri Eldar Ağayev və Kəmalə Həşimova, Yeni Azərbaycan Partiyasının Səbail rayon təşkilatının sədri Muxtar Nağıyev, 6 nömrəli məktəb-liseyin direktoru Gülşən Orucova, 132-134 nömrəli təhsil kompleksinin direktoru Sara Xanlarova, Azərbaycan Respublikası Müharibə, Əmək və Silahlı Qüvvələr Veteranları Təşkilatının Rəyasət Heyətinin üzvü, polkovnik-leytenant Bəhram Ağakişiyev, RİHBA-nın məsul əməkdaşları və rayon ictimaiyyətinin nümayəndələri iştirak etmişlər.

İlk öncə müasir və müstəqil Azərbaycan dövlətinin memarı və qurucusu, xalqımızın Ümummilli Lideri Heydər Əliyevin büstü önünə gül dəstələri düzülərək xatirəsi ehtiramla yad edilmişdir.

Tədbir zamanı çıxış edən Rayon İcra Hakimiyyətinin başçısı Vuqar Zeynalov ölkəmizin Ulu Öndər Heydər Əliyevin müəyyənləşdirdiyi siyasi-ideoloji xətti izləyərək son illərdə fövqəladə uğurlar qazanması faktının dahi Liderin şəxsiyyətinin nəhəngliyini əyani şəkildə təsdiq etdiyini bildirmişdir. Möhtəşəm Qarabağ Zəfəri ilə ölkəmiz üçün yaranan yeni reallıqların, azad edilmiş ərazilərimizin bərpasının və inkişaf dövrünün Ümummilli Liderin Azərbaycan dövləti və xalqı üçün yazdığı milli dövlətçilik tariximizin ən şərəfli qürur səhifəsi olduğunu diqqətə çatdıran RİH başçısı Azərbaycan Respublikasının Prezidenti cənab İlham Əliyevin qətiyyəti, strateji baxışı, yüksək liderlik keyfiyyətləri ilə ölkəmizin davamlı inkişafının, ərazi bütövlüyünün və regionda yeni geosiyasi reallıqların memarı olmaqla Azərbaycanı tarixinin ən qüdrətli mərhələsinə yüksəltdiyini qeyd etmişdir.

Daha sonra çıxış edən tədbir iştirakçıları müasir ölkə tarixinin 30 ildən artıq bir dövründə respublikamıza rəhbərlik etmiş dahi şəxsiyyət Heydər Əliyevin əmanəti olan müstəqil Azərbaycanı və onun dövlətçilik salnaməsində yaratdığı bu irsi qoruyub saxlamağın hər birimizin şərəfli vəzifəsi olduğunu vurğulayaraq Ulu Öndərin ölkəmizin inkişafı istiqamətindəki əvəzsiz xidmətlərindən və bu dahi şəxsiyyətin tariximizdəki əvəzsiz rolundan geniş söhbət açmışlar.