Xocalı Soyqırımının 33-cü ildönümü ilə əlaqədar Səbail Rayon İcra Hakimiyyətində tədbir keçirilmişdir

Xocalı faciəsinin 33-cü ildönümü ilə əlaqədar Səbail Rayon İcra Hakimiyyətində tədbir keçirilmişdir. Tədbirdə Rayon İcra Hakimiyyəti başçısının müavini Kəmalə Həşimova, RİHBA-nın şöbə müdirləri və məsul əməkdaşları, Xocalı sakini Rəhman İsmayılov iştirak etmişlər.
Əvvəlcə Xocalı faciəsi qurbanlarının və şəhidlərimizin əziz xatirəsi bir dəqiqəlik sükutla yad edilmişdir. Ardınca Xocalı soyqırımı ilə bağlı videoçarx nümayiş olunmuşdur.
Tədbir zamanı 1992-ci il fevralın 25-dən 26-na keçən gecə ermənilərin dinc əhaliyə divan tutduğu, uşaq, qadın və qocalara rəhm etmədikləri, Xocalıda misli görünməmiş qətliam törətdikləri bildirilərək bu faciənin xalqımızı dərindən yaraladığı, ancaq xalqın milli iradəsini, azadlıq eşqini sarsıda bilmədiyi vurğulanmışdır. Vətən müharibəsində Azərbaycan Ordusunun 30 il işğal altında qalan torpaqlarımızı azad etməklə yeni reallıq yaratdığı diqqətə çatdırılmış, 44 günlük müharibədə misilsiz igidlik nümunələri göstərən qəhrəman ordumuzun, Müzəffər Ali Baş Komandanın rəhbərliyi ilə bütün şəhidlərimizin, o cümlədən Xocalı faciəsi qurbanlarının qisasının döyüş meydanında alındığı və şəhidlərimizin qanının yerdə qalmadığı qeyd edilmişdir.
Tədbirdə iştirak edən Xocalı sakini, soyqırımının canlı şahidi Rəhman İsmayılov faciə gecəsi başına gələn acınacaqlı və şahidi olduğu dəhşətli hadisələrdən ürəkağrısı ilə bəhs etmiş, ölkə rəhbərliyi tərəfindən hər zaman onlara göstərilən yüksək diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya minnətdarlıqlarını ifadə etmişdir.