Yeni Azərbaycan Partiyası Səbail rayon təşkilatının yaranmasının 30 illik yubileyi münasibətilə tədbir keçirilib
Fevralın 21-də Yeni Azərbaycan Partiyası Səbail rayon təşkilatının yaranmasının 30 illik yubileyi münasibətilə tədbir keçirilib. Tədbirdə Səbail Rayon İcra Hakimiyyətinin başçısı Vuqar Zeynalov, Ailə, Qadın və Uşaq Problemləri üzrə Dövlət Komitəsinin sədri Bahar Muradova, Bakı Şəhər İcra Hakimiyyətinin İctimai-siyasi, humanitar məsələlər və dini qurumlarla iş şöbəsinin müdiri Elmin İmanov, Azərbaycan Dövlət İqtisad Universitetinin rektoru, professor Ədalət Muradov, YAP Səbail rayon təşkilatının sədri Muxtar Nağıyev, şəhid ailələri və YAP üzvləri iştirak etmişlər.
Tədbirdə çıxış edən Səbail Rayon İcra Hakimiyyətinin başçısı Vuqar Zeynalov 30 illik fəaliyyəti dövründə Yeni Azərbaycan Partiyasının ümummilli lider Heydər Əliyevin ideyalarına əsaslanaraq çox böyük və şərəfli yol keçdiyini vurğulayaraq bunun nəticəsi kimi son 20 il ərzində Azərbaycan tarixinin ən qüdrətli dövrünü yaşadığını qeyd etmişdir. Bütün sahələrin sürətli inkişaf etdiyi respublikamızın dünyada siyasi, iqtisadi, hərbi gücü ilə tanındığını bildirən RİH başçısı bütün bunların Azərbaycan Respublikasının Prezidenti cənab İlham Əliyevin xalqımızın milli maraqlarına cavab verən uğurlu daxili və xarici siyasətinin nəticəsi olduğunu diqqətə çatdırmışdır.
Daha sonra çıxış edən YAP Səbail rayon təşkilatının sədri Muxtar Nağıyev müstəqil Azərbaycan dövləti üçün taleyüklü məsələlərlə bağlı qərarların qəbulu məhz ümummilli lider Heydər Əliyevin qətiyyəti və uğurlu siyasəti nəticəsində mümkün olduğunu vurğulayaraq bu gün Ölkə başçısı cənab İlham Əliyevin rəhbərliyi ilə Yeni Azərbaycan Partiyasının nəinki ölkəmizdə, o cümlədən regionda olan ən böyül siyasi təşkilatlardan biri olduğunu bildirmişdir.
Tədbir zamanı rayon təşkilatının ictimai-siyasi həyatında fəal iştirak edən partiya üzvlərinə fəxri fərmanlar, Yeni Azərbaycan Partiyası sıralarına yeni qoşulmuş şəxslərə isə üzvlük vəsiqələri təqdim olunmuşdur.
Tədbirə Cövdət Hacıyev adına 3 nömrəli musiqi məktəbinin təqdimatında bədii hissə ilə yekun vurulmuşdur.
